AMP

Descrición

A experiencia de páxina (PX) é un conxunto de sinais de posicionamento —incluídos os Core Web Vitals (CWV)— que miden a experiencia de usuario ao interactuar cunha páxina web. AMP é unha ferramenta potente que aplica automaticamente moitas optimizacións e boas prácticas no teu sitio, o que che facilita lograr unha boa experiencia de páxina para os teus visitantes. O plugin oficial de AMP, con soporte do equipo de AMP, facilita levar a potencia de AMP ao teu sitio WordPress, integrándose sen problemas co fluxo normal de publicación e permitindo o uso de temas e plugins existentes.

Para ver máis vídeos coma este, consulta a serie de vídeos de AMP para WordPress.

As características principais do plugin inclúen:

1. Automatizar o máximo posible o proceso de xerar marcado válido para AMP, permitindo aos usuarios seguir os fluxos de traballo estándar aos que están afeitos en WordPress.
2. Ofrecer ferramentas de validación eficaces para axudar os usuarios a tratar as incompatibilidades con AMP cando se producen, incluídos mecanismos para identificar, contextualizar e resolver os problemas causados por erros de validación.
3. Ofrecer soporte de desenvolvemento para facilitar aos desenvolvedores de WordPress a creación de compoñentes do ecosistema compatibles con AMP e de webs e solucións con compatibilidade AMP integrada.
4. Dar soporte ao servizo de páxinas AMP para facilitar aos propietarios de sitios aproveitar a redirección móbil, as ligazóns de AMP a AMP e a xeración de AMP optimizado por defecto (mediante o port PHP de AMP Optimizer).
5. Ofrecer unha solución chave en man para que os creadores de WordPress poidan pasar de cero a publicar páxinas AMP en pouco tempo, independentemente dos seus coñecementos técnicos ou da dispoñibilidade de recursos.

O plugin oficial de AMP para WordPress é unha ferramenta potente que che axuda a crear sitios WordPress centrados no usuario, é dicir, sitios rápidos, fermosos, seguros, atractivos e accesibles. Un sitio centrado no usuario ofrecerá experiencias que encantarán aos teus usuarios e, polo tanto, aumentarán a súa participación e o éxito do teu sitio. E, contrariamente á crenza popular de que é só para sitios móbiles (xa non significa Accelerated Mobile Pages!), AMP é un framework de compoñentes web totalmente adaptable, o que significa que podes ofrecer experiencias AMP aos teus usuarios tanto en dispositivos móbiles como en ordenadores.

Público do plugin AMP: todo o mundo

Este plugin pode ser usado tanto por desenvolvedores como por usuarios que non o son:

• Se es desenvolvedor ou un usuario experto, podes aproveitar as ferramentas avanzadas para desenvolvedores que ofrece o plugin AMP para corrixir os problemas de validación que poida ter o teu sitio e acadar a compatibilidade total con AMP.
• Se non es desenvolvedor nin un usuario experto, ou simplemente non queres lidiar con problemas de validación e tarefas de desenvolvemento, o plugin AMP permíteche montar sitios totalmente compatibles con AMP con diferentes configuracións aproveitando compoñentes compatibles con AMP. O plugin axúdache a tratar os problemas de validación eliminando o marcado AMP non válido nos casos en que sexa posible, ou suprimindo por completo os plugins incompatibles con AMP nas páxinas AMP.

En definitiva, independentemente dos teus coñecementos técnicos, o plugin AMP pode resultarche útil.

Modos de modelo

O plugin oficial de AMP permite aos propietarios de sitios servir AMP aos seus usuarios de diferentes maneiras, que se denominan modos de modelo: estándar, de transición e lector. As diferenzas entre eles están no número de temas usados (un ou dous) e no número de versións do sitio (non AMP, AMP). Cada modo de modelo achega a súa propia proposta de valor e atende as necesidades de diferentes escenarios no grande e diverso ecosistema de WordPress. E en todos os casos, o plugin AMP ofrece o maior soporte posible para automatizar a xeración de páxinas AMP, así como para manter válida a opción AMP escollida. En resumo, os modos de modelo dispoñibles son os seguintes:

Modo estándar: este modo de modelo é o ideal, xa que só hai un tema para servir as solicitudes e unha única versión do teu sitio: a versión AMP. Ademais de permitir que todo o teu sitio sexa AMP-first, ten a vantaxe adicional de reducir os custos de desenvolvemento e mantemento. Este modo é a mellor opción para sitios nos que o tema e os plugins usados son totalmente compatibles con AMP. Tamén é unha boa opción se algúns compoñentes non son compatibles con AMP pero o propietario do sitio ten os recursos ou os coñecementos para corrixilos. Consulta o noso escaparate de sitios que usan o modo estándar.

Modo de transición: neste modo tamén se usa un único tema, pero pode haber dúas versións de cada páxina: AMP e non AMP. O tema activo úsase para servir as versións AMP e non AMP dunha URL determinada. Este modo é unha boa opción se o sitio usa un tema que non é totalmente compatible con AMP, pero as diferenzas funcionais entre as páxinas AMP e non AMP son aceptables (grazas á degradación gradual). Neste caso, os usuarios que acceden ao sitio desde dispositivos móbiles poden obter a versión AMP e gozar dunha experiencia optimizada que tamén mantén o aspecto e o comportamento da versión non AMP. Consulta o noso escaparate de sitios que usan o modo de transición.

Modo lector: neste modo hai dous temas diferentes, un para as páxinas AMP e outro para as páxinas non AMP e, polo tanto, tamén hai dúas versións do sitio. Este modo pode seleccionarse cando o sitio usa un tema incompatible con AMP, pero o nivel de incompatibilidades é significativo sen unha degradación gradual. Tamén é unha boa opción se non tes coñecementos técnicos (ou simplemente non queres lidiar coas incompatibilidades) e, por tanto, queres fluxos de traballo simplificados e robustos que che permitan aproveitar AMP con mínimo esforzo.

Recomendaríanse modos diferentes en escenarios diferentes, segundo as particularidades do teu sitio e o teu perfil. Ao configurar o plugin, suxerirá o modo que poida ser mellor para ti segundo a súa avaliación do tema e dos plugins usados no teu sitio. E, independentemente do modo usado, tes a opción de servir todo o sitio ou só unha parte como AMP. Isto dache toda a flexibilidade que precisas para comezar a activar AMP no teu sitio de forma progresiva.

Ecosistema AMP

Hoxe en día é posible montar sitios espectaculares centrados no usuario con tecnoloxía do plugin AMP, elixindo temas e plugins dun ecosistema compatible con AMP en crecemento. Neste contexto, o plugin AMP actúa como orquestrador de todo o proceso de creación e publicación de contido AMP; serve de validador e garante, o que facilita non só chegar ás experiencias AMP, senón mantelas con confianza.

Moitos desenvolvedores de temas e plugins populares esforzáronse por ser compatibles co plugin oficial de AMP. Se usas un tema como Astra ou Newspack, ou plugins como Yoast ou WP Forms, funcionarán sen ningún axuste! Podes ver a lista crecente de temas e plugins probados.

Desenvolvemento con AMP

Aínda que hai un ecosistema crecente de compoñentes de WordPress compatibles con AMP, aínda queda camiño para que a maioría do ecosistema sexa compatible con AMP. Se es programador, ou tes os recursos para levar a cabo proxectos de desenvolvemento, nalgúns casos poderías querer desenvolver un plugin ou tema personalizado para as túas necesidades específicas. O plugin oficial de AMP pode axudarte moito ao ofrecerche ferramentas de desenvolvemento potentes e eficaces que achegan luz ao proceso de desenvolvemento de AMP tal e como se fai en WordPress. Isto inclúe mecanismos para detallar as causas raíz dos problemas de validación, o espazo contextual para entendelos correctamente e métodos para tratalos durante o proceso de acadar a compatibilidade total con AMP. Le máis sobre as ferramentas para desenvolvedores.

Primeiros pasos

Para saber máis sobre o plugin e comezar a aproveitar as súas capacidades para impulsar o teu fluxo de publicación AMP, visita o sitio de produto oficial do plugin AMP.

Se es desenvolvedor, animámoste a seguir o desenvolvemento deste plugin en GitHub ou a contribuír a el.

Preparamos unha páxina de FAQ completa e documentación extensa para axudarte a comezar do xeito máis áxil posible.

Pero se precisas axuda, estamos aquí para darte soporte no foro de soporte do plugin, así como a través das issues de GitHub (para erros técnicos e solicitudes de características). E o noso próspero ecosistema de expertos en AMP conta con freelances independentes e con axencias de nivel empresarial, por se precisas soporte comercial!